Tingfólk í Fólkaflokkinum kunnu atkvøða eftir egnari sannføring

Løgtingslimir hjá fólkaflokkinum skulu frameftir kunna atkvøða eftir egnari sannføring í etiskum málum, og Annika Olsen kann stilla upp fyri flokkin, hevur hon hug til tað.

Tað var ein av niðurstøðunum á fundinum hjá Fólkaflokkinum í gjár, har Beinir Johannesen var valdur til nýggjan formann eftir Christian Andreasen.

- Hamurin er skiftur, men politikkurin er framvegis tann sami, sigur nývaldi formaðurin:

Beinir Johannesen sigur, at hann fer at seta seg í samband við Sólvit Nolsø, Heðin Zachariasen og Christian Andreasen fyri at vita, um teir hava broytt støðu eftir avgerðirnar í gjárkvøldið. Teir boðaðu allir frá í gjár, at teir ikki stilla upp til løgtingsvalið.

Nýggi formaðurin sigur, at hann fer eisini at seta seg í samband við Anniku Olsen.