Japan bleiv fimta land á mánanum

Seinnapartin í gjár okkara tíð setti japanski robotturin Slim seg á mánan, og harvið bleiv Japan fimta landið at seta eitt far á mánan - eftir USA, Sovjetsamveldið, Kina og India.

Tað skrivar Reuters.

Slim, sum er ein stytting av Smart Lander for Investigating Moon, fekk tó ikki eina góða byrjan á mánanum, tí av ókendum orsøkum virka sólkyknurnar, sum skulu geva robottinum streym, ikki. Tað merkir, at Slim bara hevur battaríini at dúva uppá, og tey brenna út so líðandi. Og tá tey eru útbrend - væntandi verður tað um nakrar fáar tímar - kann Slim ikki longur taka ímóti boðum ella senda boð til Jørðina.

Tí verður nú raðfest, hvat skal fáast burtur úr Slim og mánavitjanini, meðan hann enn hevur streym. Ætlanin var, at Slim tær næstu tvær vikurnar skuldi kanna jarðfrøðina á mánanum. Hann er farin at senda dátur niður á jørðina sum ætlað, men enn er óvist, hvussu nógv robotturin fær tíð til at kanna, áðrenn hann brennur út.