Nú skal sleppast undan tvídráttinum um heilsutrygdargjald

Løgtingið skal, sambært skránni fyri dagin í dag, viðgera málið, sum skal gera, at sleppast kann undan áralanga tvídráttinum um heilsutrygdargjald.

Ein lógarbroyting hjá Heilsumálaráðnum skal fáa samsvar millum føroysku heilsutrygdarlógina og "nordisk konvention om social sikring" um heilsutrygdargjald. 

Fólk sleppa sum nú er ikki undan at rinda til Heilsutrygd, tí lógin sigur, at øll, sum eru fylt 18 ár og búgva í Føroyum, eiga at gjalda, sama um tey eisini gjalda í Noregi til dømis.

Í galdandi lóg er ongin heimild hjá Heilsutrygd at gera undantak frá gjaldsskylduni. 

Hetta er ikki í samsvari við "nordisk konvention om social sikring," og tí er neyðugt at broyta heilsutrygdarlógina.

Kunnu fáa undantak

Sambært lógaruppskotinum kunnu fólk, sum rinda heilsutrygdargjald í øðrum Norðanlandi, og sum ikki kunnu fáa frádrátt sambært skattalógini, fáa undantak at rinda heilsutrygdargjald í Føroyum.

Fólk missa tó ikki rættin at fáa veitingar, sum heilsutrygdarlógini gevur.

Lógarbroytingin skal koma í gildi 1.juli.

Herfyri vildi Processbevillingsnævnet ikki loyva Heilsutrygd í Hægstarætt við málinum um heilsutrygdargjald hjá teimum, sum sigla í øðrum londum.

Heilsutrygd tapti bæði í Føroya rætti og í Eystara landsrætti.