Drap føroyskan psykiatara - dømdur óásetta tíð í serligum varðhaldi

Ein 41 ára gamal maður skal í óásetta tíð í varðhald á Sikringen, sum er serliga tryggjað psykiatrisk deild í Slagelse í Danmark.

Tað avgjørdi rætturin í Glostrup í dag, eftir at maðurin var funnin sekur í at hava dripið Mariann Stenberg, psykiatara, sum er føroyingur, og fyri drápsroynd móti tveimum starvsfólkum í psykiatriini. 

Sambært ákæruritinum, fór 41 ára gamli maðurin inn á Rættarpsykiatriska ambulatoriið í Brøndby í juli í fjør vápnaður við knívi. 

Hótti onnur starvsfólk við knívi

Umframt at drepa 66 ára gomlu Mariann Stenberg, stakk hann eisini tvey onnur starvsfólk við knívi. 

Dómsmansrætturin sigur í grundgevingini, at dómurin samsvarar við tilmæli frá rættarlæknaráðnum um varðhald á serliga tryggjaðu psykiatrisku deildini, Sikringen.

- Avgerðin er tikin við støði í metingum, lyndinum hjá tí ákærda og at hann er dømdur fyrr, sigur rættarformaðurin, sambært dr.dk.

Verjin hjá manninum sigur, at dómurin verður kærdur við kravi um, at maðurin verður frídømdur.