Forboð fyri at hjálpa russiskum skipum, sum fiska kongafisk

Nýggj kunngerð í Grønlandi fer at gera tað torførari hjá russiskum fiskiskipum at fiska kongafisk í tí partinum av Irmingarhavinum, sum er millum grønlendsku eysturstrondina sunnanfyri og yvir móti Íslandi.

Tað skrivar Sermitsiaq.

Landsstýrið í Grønlandi hevur sent kunngerð til hoyringar, har forboð verður fyri umskiping og øðrum havnartænastum, og eisini forboð fyri at umskipa fisk á víðum havi.

Við kunngerðini verður eisini forboð fyri at bunkra og at veita annan stuðul til skip, sum hava kongafisk umborð.

Í ferð við at niðurfiska stovnin

Sagt verður, at serliga russiskir trolarar 'eru spakuliga í ferð við at niðurfiska stovnin', skrivar Sermitsiaq.

- Grønland er umboðað í NEAFC saman við Føroyum í DFG-sendinevndini, sum er stytting fyri 'Danmark vegna Føroyar og Grønland'. 

DFG-sendinevndin hevur verið við til at atkvøða fyri forboðnum, og álagt er Grønlandi at seta kunngerðina í gildi, stendur í viðmerkingum til nýggju kunngerðina, sambært Sermitsiaq.

Evstamark fyri hoyringini er 2.mai.