AstraZeneca tekur koppingarevni fyri koronu aftur

AstraZeneca-koppingarevnið fyri koronu verður nú afturkallað um allan heimin. 

Hetta verður gjørt av handilsligum ávum, og nýtt koppingarevni, sum vinnur á nýggjum frábrigdum, kemur í staðin. 

Tað skrivar The Telegraph.

- Vit eru errin um leiklutin, sum Vaxzevria hevði í endanum á alheims farsóttini. Sambært óheftum metingum, vóru 6,5 milliónir mannalív bjargað tað fyrsta árið, og meira enn tríggjar milliardir skamtar vóru givnir í heiminum, sigur felagið í fráboðan.

Afturtøkan hendir stutt eftir, at heilivágsframleiðarin viðgekk, at koppingarevnið kundi hava sjáldsom hjáárin við sær, skrivar The Telegraph.

AstraZeneca sigur, at afturkallingin hevur einki við hetta at gera, skrivar blaðið.

Koppingarevnið er neyvt granskað í Bretlandi fyri hjáárin, sum elvdi til blóðtøpp.