Hoyra ikki Kringvarpið

Hóast landið hevur skyldu til at tryggja, at øll kunna lurta eftir Kringvarpinum, hoyra nógvir útróðrarmenn ikki Kringvarpið.

Bárður á Lakjuni, løgtingsmaður, sigur, at útróðrarmenn hava gjørt vart við, at ikki ber til at hoyra útvarpið hjá Kringvarpinum nóg væl uttan fyri landoddarnar á opnum havi.

Hann sigur eisini, at privatu útvarpsrásirnar hoyrast nógv betur enn Kringvarpið. 

Hann spurdi tí Sirið Stenberg, landsstýriskvinnu, um hetta.

Hon svarar, at tá trupulleikar eru við FM-dekningi hjá Kringvarpinum, fær NET, sum umsitur sendinetið hjá KvF, vanliga kunning um hetta, antin beinleiðis frá lurtarum ella umvegis KvF. 

NET kannar, hvørji øki, talan er um, og ger neyðugu tillagingarnar fyri at betra um hoyrilíkindini.