1.478 milliardir norskar krónur í inntøkum fyrra hálvár

Norski oljugrunnurin hevði 1.478 milliardir norskar kr. í inntøkum fyrra hálvár í ár, skrivar NRK.

Avkastið er 8,6 prosent, og upphæddin svarar til umleið 936 milliardir kr. í okkara pengum. 

Tað er serliga góða gongdin á partabrævamarknaðinum, sum gevur gott avkast.

Grunnurin fór upp um 11.000 milliardir kr., áðrenn fyrra hálvár var úti.

Við árslok í fjør var virðið í grunninum slakar 10.000 milliardir kr.

Virksemið hjá oljugrunninum byggir mest á at eiga partabrøv í nógvum fyritøkum kring heimin, og tað er 72 prosent av virkseminum hjá grunninum.

Norski oljugrunnurin var settur á stovn í 1996 og er síðani vaksin nógv. Hann er í dag millum størstu almennu pengatangar í øllum heiminum.