Tríggjar nýggjar ráðharrastovur í donsku stjórnini

Danska stjórnin er umskipað.

Mette Frederiksen, forsætisráðharri, kunngjørdi fyrrapartin nøvnini á teimum, sum vera ráðharrar í nýggju ráðharrastovunum, sum eru skipaðar.

Men tíðindini, sum vekja størstan ans sambært danska kringvarpinum, eru, at yvirborgarstjórin í Keypmannahavn, Sophie Hæstorp Andersen, verður nýggjur almanna- og bústaðarráðharri.

Pernille Rosenkrantz-Theil fer úr hesum ráðharrasessinum, og fer nú at royna at gerast yvirborgarstjóri í Keypmannahavn eftir næsta kommunuval. 

Tjóðartrygd og tilbúgving

Torsten Schack Pedersen, sum hevur verið framsøgufólk í Vinstraflokkinum, verður ráðharri fyri tjóðartrygd og tilbúgving, sum  er nýggj ráðharrastova.

Jeppe Bruus, sum hevur verið skattamálaráðharri, skal fremja víðfevndu og framsóknu avtaluna, um at gera Danmark umhvørvisvinarligari, í verki. Hetta er eisini ein nýggj ráðharrarstova.

Avtalan ber í sær, at 390.000 hektarar av landbúnaðarjørð verða gjørdir til skóg og náttúru. Avtalan ber eisini í sær, at framleiðslan hjá matvøru- og landbúnaðinum skal leggjast um.

Og so fær Danmark aftur ein evropamálaráðharra. Tað verður fyrrverandi javnstøðumálaráðharrin, Marie Bjerre.

Hon skal fyrst og fremst fyrireika Danmark at taka við formansskapinum í ES.