IAEA stúrir fyri trygdini á kjarnorkuverki í Kursk

Stjórin í altjóða kjarnorkustovninum IAEA, Rafael Grossi, hevur tosað við ukrainska forsetan, Volodymyr Zelenskyj, um trygdina á russiska kjarnorkuverkinum í Kursk.

Eftir at Ukraina tók seg inn í Russland, skulu samanbrestir hava verið minni enn 50 kilometrar frá kjarnorkuverkinum.

Grossi vitjaði á kjarnorkuverkinum í síðstu viku.

- Vit gjørdu eina meting av tí, sum eg sá á kjarnorkuverkinum. Fyri meg hevur tað stóran týdning at tosa um mínar upplivingar á verkinum, og sjálvandi at endurtaka týdningin av at forða fyri eini støðu, sum kann elva til kreppu, segði Grossi eftir fundin við Zelenskyj.

Grossi kom til Ukraina í hesi vikuni og hitti Zelenskyj í gjár.

Í dag fer hann vitja á russiskt-hersetta kjarnorkuverkinum í Zaporizjzja.