Kunnu fáa ein altjóða meistara aftrat í dag

Føroyar kunnu fáa nýggjan altjóða meistara í talvi í dag.

Fær Høgni Egilstoft Nielsen javnt ella vinnur hann á fyrsta borði í dystinum móti Luksemburg á talvolympiaduni í Budapest í dag, er triði og síðsti IM-normurin rokkin. 

Mótstøðumaður hansara verður Michael Wiedenkeller, ið sjálvur er altjóða meistari. Wiedenkeller er svii, var í 1990 Svøríkismeistari, men síðani 2010 hevur hann umboðað Luksemburg, har hann hevur búð seinnu árini.

Høgni hevur svarta fólkið móti Michael Wiedenkeller. Dysturin byrjar klokkan 2 í dag.

Føroyar hava í løtuni tveir altjóða meistarar í talvi, John Rødgaard og John Arna Nilssen. Helgi Dam Ziska var altjóða meistari, áðrenn hann í 2016 gjørdist stórmeistari.

Gott úrslit móti Sveis

Føroyar fingu frálíkt úrslit í áttanda umfari á talvolympiaduni í gjár.

Dysturin móti Sveis, sum er styrkismett væl ovari enn Føroyar, endaði javnur 2 - 2.

18 ára gamli føroyameistarin, Luitjen Akselsson Apol, tryggjaði Føroyum javnleikin við sigri á 4 borði. Helgi Dam Ziska og Høgni Egilstoft Nielsen telvaðu javnt á fremru borðunum, og Rógvi Egilstoft tapti á triðja borði.

Luitjen Akselsson Apol er nú føroyskur toppskjútti í Budapest, og stendur í løtuni til at ganga fram meira enn hálvthundrað ratingstig.

Føroyar hava nú níggju stig fyri fýra vunnar dystir og ein javnleik - umframt trý tap - og standa í løtuni nummar 64 av teimum 188 londunum í kappingini.

Talvolympiadan endar sunnudagin.