Javnaðarflokkurin í Havn í tvíningar - nýggjur listi er gjørdur

Uppstillingin til kommunuvalið í Havn gekk ikki sum ætlað hjá Javnaðarflokkinum.

Fyrst segði atkvøðuslúkurin og borgarstjórin seinastu mongu árini, Heðin Mortensen, farvæl, og dóttirin, Elin Heðinsdóttir Joensen, kom á listan í staðin. Men so kom Heðin Mortensen aftur, og tá bleiv galið. 

Fyrst fór Kári Johansen á listan hjá Framsókn

Tróndur Sigurðsson, Bjørg Dam og Súna Mørk boðaðu síðani frá, at tey stillaðu ikki upp aftur.

So fór Kári Johansen av aftur listanum hjá Framsókn.

SEV, aðalfundur í SEV, Kári Johansen

Kári Johansen hevur verið formaður í SEV -stýrinum í hesum valskeiðnum. Fyrst skuldi hann stilla upp fyri Framsókn, men nú skilst á lagnum, at hann er á nýggja listanum, sum Tróndur Sigurðsson hevur tikið stig til. (Mynd: Bjarni Árting Rubeksen)

Nýggjur listi

Og nú kemur so nýggjur listi, har tað er heilt vist, at Tróndur Sigurðsson er stigtakari og er á listanum, og alt bendir á, at tað eru Kári Johansen, Bjørg Dam og Súna Mørk eisini. Sotatt eru fýra av teimum seks, sum í løtuni sita í Tórshavnar Býráð fyri Javnaðarflokkin, nú uppstillað á øðrum lista.

Tilsamans fingu hesi 1.610 atkvøðu á valinum í 2020. Av teimum fekk Tróndur Sigurðsson 882 atkvøður.

Kristianna Winther Poulsen, Kári Johansen, Tórshavnar býráð 2021-2024

Kristianna Winther Poulsen og Heðin Mortensen eru tey einastu av býráðslimunum hjá Javnaðarflokkinum seinasta valskeið, sum stilla upp á javnaðarlistanum. (Mynd: Bjarni Árting Rubeksen)

Á javnaðarlistanum eru bara Heðin Mortensen og Kristianna Winther Poulsen eftir av teimum, sum í dag sita í býráðnum fyri Javnaðarflokkin.

Vit høvdu ætlað at spurt tey á nýggja listanum, hvør hugsjónarligur munur er á nýggja listanum og gamla javnaðarlistanum. Ella um listin er gjørdur orsakað av persónligum ósemjum. Men tey vilja ikki gera viðmerkingar, fyrr enn listin er vorðin almennur.