Tvøroyri: Tríggjar stilla ikki upp aftur

Eftir býráðsvalið í 2020 komu kvinnurnar í meiriluta í Tvøroyrar kommunu. Men til kommunuvalið hesaferð stilla tríggjar av teimum fýra, sum vórðu valdar inn ta ferðina, ikki upp.

Tær tríggjar eru Kristina Roest, Súsanna Bertholdsen og Jónleyg Jespersen Bech. Kristina Roest og Súsanna Bertholdsen vórðu báðar valdar inn fyrstu ferð í 2016. Jónleyg J. Bech var nývald.

Tá Súsanna Bertholdsen í 2022 tók sæti á Løgtingi, fór hon í farloyvi frá kommununi, og Eyð Eidesgaard kom í hennara stað. Eyð Eidesgaard stillar eisini upp aftur hesaferð.

Hini í býráðnum stilla øll upp aftur í ár. Tey eru Kristin Michelsen, Anita Vibergsdóttir, Alvi Mortensen og Bjarni Hammer.

Eins og til seinasta val eru tríggir listar í ár komnir inn til kommunuvalið á Tvøroyri.

Á valinum fyri fýra árum síðan fekk Felagslistin hjá Kristini Michelsen 51,6 prosent av atkvøðunum og fýra býráðslimir. Javnaðarflokkurin fekk 37,5 prosent og tríggjar býráðslimir. Triði listin, Listi V, fekk 11 prosent av atkvøðunum, og tað rakk ikki til umboðan í býráðnum.