Heilsutrygdargjaldið í tinginum í dag

Í dag fer løgtingið at viðgera uppskotið um at rinda aftur heilsutrygdargjald.

Fólk, sum hava rindað til eina sosiala skipan í øðrum landi, hava eisini rindað til Heilsutrygd. 

Tað hava tey ikki skyldu til, sambært "Nordisk konvention om social sikring."

Í 2013 kærdi eitt fólk hetta og kravdi at fáa sítt gjald til Heilsutrygd afturgoldið. 

Skal rindast aftur

Heilsutrygd royndi málið í rættarskipanini.

Men í 2024 bleiv endaliga staðfest, at Heilsutrygd skal rinda heilsutrygdargjald aftur til teirra, sum lúka treytirnar, og sum søkja um at fáa gjaldið afturrindað.

Sambært Taks er talan um 1.293 fólk, sum hava rætt til at fáa góðar 22,3 milliónir krónur aftur frá Heilsutrygd.

Tingfundurin í dag byrjar við ófráboðaðum spurningum til landsstýrið.

Tingfundurin er kl.11.00.