Verjugreinari: Russland kennir seg ikki trýst

Russland kennir seg als ikki trýst, eftir at evropeisku stjórnarleiðararnir hittust  á toppfundi í London í gjár. 

Tað sigur Peter Viggo Jakobsen, lektari á danska verjuakademinum.

- Russland er als ikki trýst. Fyribils er tað bara prát, sigur Peter Viggo Jakobsen.

Endamálið við fundinum í gjár  var annars, at evropeisku leiðararnir skulu vísa styrki og standa saman.

Peter Viggo Jakobsen

Peter Viggo Jakobsen.

Mette Fredriksen, danski forsætisráðharrin, segði eftir fundin, at "tað dámar ikki okkara fíggindum", at vit standa saman.

Russland hyggur mestsum bara at, hvat USA ger, tá ið talan er um at friðaravtalu í Ukraina.

- Teir vóna, at teir saman við Trump kunnu fáa eina rímiliga góða friðaravtalu, men teir vita sjálvandi ikki, hvat tað endar við, sigur Peter Viggo Jakobsen.

Dmitrij Peskov - Mynd: Ritzau Scanpix

Dmitri Peskov.

Russar væl nøgdir

Broytti uttanríkispolitikkurin hjá amerikanska forsetanum, Donaldi Trump, fellur í góða jørð í Russlandi. 

- Nýggja umsitingin í USA broytir skjótt uttanríkispolitikkin. Hann hóskar væl til okkara framtíðarhugsan, sigur Dmitri Peskov, talsfólk hjá russiska forsetanum Vladimir Putin.

- Nakað er eftir á leiðini, tí stórur skaði er gjørdur á sínámillum viðurskifti, sigur hann.

- Men um leiðararnir báðir, Putin og Trump, halda frá á hesi leið, so kann tað henda skjótt og eydnast væl, sigur Peskov.