Framtíðin er bjørt, men langt er á mál

- Tað er nógv eftir at stríðast fyri. Tað eru nógv mál eftir, har kvinnur og menn ikki vera viðfarin eins, eisini í løgtinginum.

Bjørt Samuelsen er avgjørd á málinum, tá ið hon verður spurd um altjóða kvinnudagurin enn er ein stríðsdagur. Nógv er vorðið betri, men nógv kann eisini gerast betri. Spurd um tað, at hon er løgtingsforkvinna, ikki netupp er dømi um, at kvinnur kunnu um bara tær vilja, svarar hon kontant:

- Tað er ein forferdiliga naivur hugsanarháttur, men tað eru nógv, sum halda hatta. Persónliga havi eg ikki møtt nøkrum forðingum fyri at koma í hendan sessin, men vit síggja eisini aðrar sessir, har ongar kvinnur hava verið, og eitt gott høvi var til dømis beint nú at velja eina kvinnu í landsstýrissessin í fiskivinnumálum, har tað ongantíð hevur verið ein kvinna, sigur Bjørt Samuelsen.

Hon er samstundis skjót at staðfesta, at tað hevur stóran týdning, at tað er eitt javnt býti í heiminum, um tað skal bera til, og uttan mann sín, Peter Østergaard, hevði hon ikki verið, har hon er í dag.

Bjørt Samuelsen er mest sum vaksin upp á bygd, tí tá hon var barn og ung úti í Marknagili, var tað langt uttan fyri býin. Har vóru seyðir, ross, gæs og dunnur, og henni gav tað eitt einrúm, har hon trívist enn, tann dagin í dag.

2. mars fylti Bjørt Samuelsen 60 ár, og hetta hevur givið henni høvi at hugsa um, hvat hon skal brúka restina av sínum lívi til. 

- Eg kenni meg unga, sterka, ógvuliga roynda og væl fyri. So á tann hátt er tað ordiliga deiligt at vera seksti, sigur hon.

Hoyr alla samrøðuna við Bjørt Samuelsen her.