Vinnari av grønlendska valinum: Trump er óhóskandi

Sigursharrin av grønlendska valinum Jens-Frederik Nielsen, formaður í flokkinum Demokraatit, kallaði í gjárkvøldið viðmerkingina hjá Trump um at leggja Grønland undir USA, fyri óhóskandi. 

Á sínum facebook vanga skrivaði hann seint í gjár, at viðmerkingin hjá Trump vísir enn einaferð, at grønlendingar eiga at standa saman í tílíkum støðum. 

Hann vísir eisini á, at politiskar ósemjur ikki skulu byrja nú beint eftir at úrslitið av valinum er vorðið alment. 

"Vit mugu standa saman - og tit kunnu rokna við at vit fara til samráðingarnar við hesum í huga. "

Jens-Frederik Nielsen fekk flestar persónligar atkvøður av øllum valevnunum við 4850 atkvøðum og flokkur hansara, gjørdist eisini størsti flokkur.