Norski forsætisráðharrin: Fyrireikið tykkum til kríggj

Norski forsætisráðharrin Jonas Gahr Støre heitir á norðmenn um at fyrireika seg til kríggj. 

Tað skrivar norska blaðið Dagens næringsliv.

Hann vísur serliga á eitt óútrokniligt Russland, sum orsøk.

- Vit mugu aftur fyrireika okkum til, at kríggj kann raka Noreg, sigur Støre við blaðið.

Russland er vandamikið og óforútsigiligt

Fráboðanin kemur í sambandi við, at stjórnin leggur fram fyrstu nationalu trygdarstrategi fyri Noreg fyrrapartin í dag.

- Vit mugu liva við einum vandamiklari og óforútsigiligari Russlandi, sum granna. Og við hesum granna og við tí, sum hendir í Evropa, mugu vit vera fyrireikað uppá, at vit eisini kunnu verða rakt, sigur Støre.

- Tað er ikki nakað, sum vit síggja sum sannlíkt ella nakað, sum er við at henda; men at taka ábyrgd av frælsi og sjálvstøðu snýr seg um, at vit mugu vera fyrireikað, leggur hann afturat.