Búskaparkreppa hóttir Grønland

Grønland er á veg inn í eina búskaparliga kreppu, og tí er neyðugt við stórum sparingum næstu árini.

Tað sigur Mute B. Egede, sum nú er landsstýrismaður í fíggjarmálum.

Í tíðindaskrivi upplýsir Mute B. Egede, at inntøkurnar frá fiskivinnuni eru minkandi, minni kemur inn í skatti, samstundis sum almennu útreiðslurnar økjast.

Grønlendska fíggjarmálaráðið hevur tí gjørt eina langtíðarætlan, sum merkir, at tað almenna skal spara og finna nýggjar inntøkur fyri tilsamans 864 milliónir krónur, næstu fýra árini.

Mute B. Egede boðar í sama viðfangi frá, at grønlendska landsstýrið í heyst fer undir fleiri nýskipanir.