HM: Spíska sær vápnini við venjingardysti ímóti Íslandi

Punktum verður sett fyri HM-fyrireikingarnar hjá føroysku hondbóltskvinnunum, tá Ísland vitjar við Tjarnir í kvøld.

Landsliðshópurin hevur vant saman síðan mánadagin, og nú skal tað seinasta fáast upp á pláss, áðrenn fráferð til Týsklands mánadagin og dystin ímóti Montenegro mikudagin.

Júst hesum báðum londunum hevur Føroyar spælt ímóti fyri kortum í EM-undankappingini. Tað eydnaðist endiliga at vinna á Íslandi, áðrenn Montenegro vórðu eitt vet ov sterkar í Føroyum.

Serliga Tatjana Brnovic á strikuni hjá Montenegro gav føroysku verjuni stórar trupulleikar, og júst sterkar strikur hava verið ovarliga á breddanum hjá Claus Mogensen hesa vikuna.

 - Hesum høvdu vit trupulleikar við ímóti Montenegro, men vit spæla eisini ímóti Spania, sum jú eisini hevur líka stórar og sterkar strikuspælarar, segði Claus Mogensen við 3-2

SÍ EISINI: Hondbóltskvinnurnar møttar til HM-fyrireiking

Sambært Portal.fo er ætlanin at brúka allan hópin í dystinum ímóti Íslandi í kvøld. Íslendingar fyrireika seg eisini til endaspælið.

Dysturin er klokkan 19.00 í kvøld, og Kringvarpið vísir dystin frá klokkan 18.50.