Føroyar hanga í Serbia

Hálvleiksstøðan í øðrum dystinum í HM-miðumfarinum millum Serbia og Føroyar er 16-14. 

Føroysku hondbóltskvinnurnar fylgdu væl við teimum serbisku í byrjanin av øðrum dystinum í HM-miðumfarin í Dortmund. 

Men tá átta minuttir vóru spældir, so byrjaði Serbia at draga frá.

Brenna og tekniskar villur

Hetta hekk saman við, at føroysku leikararnir byrjaðu at brenna og gera tekniskar villur.

Tað fyrra hevur verið trølsligi føroyski veikleikin í allar kappingini. Tað seinna er nokk eitt tekin uppá, at møðin byrjar at spæla okkara eitt puss.

Serliga Jana Mittún ger feilir, ið vit ikki síggja hana gera vanliga.

Tveir steðgir

Júst sum at dysturin var við at gleppa Føroyum ordiliga av hondum, so fóru dómararnir tvær reisur út at kanna málmyndatólini, tí ivamál var, um bólturin var innanfyri. Hóast báðar støðurnar gingu Føroyum ímóti, so vóru hetta tveir steðgir, ið góvu føroysku leikarunum kærkomna luft, so tær onkursvegna fingu fatur í dystinum aftur. 

Lítil og eingin munur er á føroysku og serbisku leikarum, tá vit hugsa um hondbóltsførleikar. Munurin er støddin, tyngdin og royndirnar hjá leikarunum. Og so er breiddin á føroyska liðnum ikki tann saman sum hjá serbum. 

Hjá Føroyum hongur alt á trimum leikarum, Janu Mittún, Súnu Hansen og Pernille Brandenborg. Tørvur er á, at Maria Nólsoy tekur størri ábyrgd, tí hon tykist vera lykilin til, at Føroyar kunnu sifta Serbia.