Jóannes Bjartalíð skal spæla yrkisfótbólt í Kasakstan

Í eina tíð hevur tað verið greitt, at føroyski landsliðsleikarin Jóannes Bjartalíð ikki fór at halda fram í norska felagnum Fredrikstad, haðar hann flutti til úr KÍ í 2023, tá Mikkjal Thomassen bleiv venjari í felagnum. 

Síðani hevur nógv verið gitt, hvar leiðin hjá Bjartalíð nú gekk. 

Í dag er sáttmáli kunngjørdur millum Jóannes Bjartalíð og FC Qyzyljar (úttalast Kyzylzhar) úr Kasakstan - av øllum støðum. 

Harvið verður landsliðsmiðvallarin fyrsti føroyingur, sum skal royna seg í Kasakstan. 

Nýggja felagið hjá Jóannes Bjartalíð spælir í bestu deildini í Kasakstan, sum byrjar í mars. 

Í fjør endaði FC Qyzyljar á 9. plássi í deildini - hon hevur 14 lið.