Norðmenn hava mist álitið á krúnprinsessuna

Tríggir av fýra norðmonnum hava mist álitið á Mettu-Marit krúnprinsessu.

Tað vísir ein meiningakanning, sum Norstat hevur gjørt fyri norska kringvarpið, NRK, og Dagbladet.

1025 fólk vórðu spurd, hvussu stórt álit tey høvdu á krúnprinsessuni eftir miðlaumrøðuna av sambandi hennara við Jeffry Epstein.

76 prosent svaraðu, at tey hava fingið minni álit á krúnprinsessuni, meðan 23 prosent siga, at álitið er óbroytt, skrivar NRK.

Tey ungu hava minst álit

Serliga nógv er álitið minkað millum tey yngru, hjá fólki millum 18 og 39 ár. Av teimum svara 81 prosent, at tey hava minni álit á krúnprinsessuni, enn áður.

44 prosent av teimum spurdu halda ikki, at Mette-Marit kann gerast drotning í Noregi. 22 prosent halda, at tað kann hon, meðan 35 prosent vita ikki.

Kongshúsið vil ikki gera viðmerkingar til spurnakanningina.

- Vit plaga ikki at gera viðmerkingar til slíkar kanningar, sigur kunningarfólkið, Sara Svanemyr, við norska Kringvarpið.

Tætt samband við Epstein

Fríggjadagin almannakunngjørdi amerikanska løgmálaráðið fleiri enn tríggjar milliónir nýggj skjøl í Epstein-málinum.

Tilfarið vísir nógv og tætt samband í fleiri ár millum krúnprinsessuna og dømda kynsbrotsmannin, Jeffey Epstein.

Mette-Marit krúnprinsessa hevur viðgingið at hava víst sera vánalig metingarevni, og hevur biðið um umbering.

Fleiri onnur fólk í høgum størvum í Noregi eru eisini sett í samband við Jeffrey Epstein.