Býráðslimir í Aarhus mæla til at styrkja ríkisfelagsskapin

- Aarhus kommuna eigur at styrkja ríkisfelagsskapin. 

Tað siga býráðslimirnir í Aarhus kommunu, Jakob Søgaard Clausen fyri Danmarksdemokratarnar og Jesper Kjeldsen fyri Sosialdemokratarnar, í tíðindaskrivi, sambært heimasíðuni hjá grønlendska kringvarpinum, KNR.

Kommunan eigur at bøta um karmarnar hjá borgarum úr Føroyum og Grønlandi, serliga nú ið ríkisfelagsskapurin hevur so stóran týdning, siga teir.

Felags søga

- Ríkisfelagsskapurin er týðandi partur av okkara felags søgu, og uppaftur týdningarmiklari í okkara felags framtíð. Vit hava ábyrgdina av, at mongu grønlendingarnir og føroyingarnir, sum búgva í Aarhus, uppliva at vera natúrligur og sjónligur partur av felagsskapinum í býnum, sigur Jesper Kjeldsen, sum sjálvur hevur búð og virkað í Grønlandi.

- Vit vilja hava varandi átøk, sum styrkja trivnaðin, og varpa ljós á sterku bondini millum Aarhus, Grønland og Føroyar, sigur Jepser Kjeldsen.

Flagga á tjóðardegnum

Eitt av tiltøkunum er, at kommunan flaggar á føroyska og grønlendska tjóðardegnum, og at almenn listarverk vera í Aarhus, sum ímynda ríkisfelagsskapin millum teir tríggjar partarnar í ríkisfelagsskapinum.

Býráðspolitikararnir báðir vóna, at aðrar kommunur gera sum Aarhus, soleiðis at føroyingar og grønlendingar trívast.