FM í skjóting: Endiliga eydnaðist hjá Esmari

Tað kom óvart á fleiri, tá formaðurin í Skjótisambandi Føroya, Esmar Joensen, skeyt seg í FM-finaluna í OL-trap sunnudagin. 

Høvuðspersónurin sjálvur var heldur ikki fyrireikaður upp á støðuna.

 - Eg hevði ikki nokk av patrónum við, so eg mátti senda onkran niðan í bilin eftir meira, tí vit komu so langt, segði Esmar Joensen, sum vann finaluna við 39 leirdúgvum ímóti teimum 36 hjá Finn Ludvig.

 - Tað er í lagi, at onkur annar vinnur, tað er heilt okey. Nummar tvey er eisini í ordan, segði veteranurin, Finn Ludvig, sum vann meistaraheitið í fjør.

Tvær dúgvur vóru á muni, tá komið var til seinastu 10 skotini.

 - Eg meini, at tá hann skjýtur sína seinastu ella næstseinastu, rakar hann ikki, og tá visti eg, at tað var sloppið, segði Esmar Joensen.

Tvær FM-kappingar eftir

Næstseinasta vikuskiftið vann Alex Johannesen úr Eysturskoti FM í automatic ball trap, og í góðveðrinum sunnudagin skeyt Esmar Joensen seg til sítt fyrsta FM-heiti.

Tvær føroyameistarakappingar eru nú eftir hjá Skjótisambandi Føroya. Næsta vikuskifti verður skotið í greinini OL-skeet í Vestmanna og í Havn. Sambært Esmari Joensen er Tórur Fløtt favorittur til ta kappingina. 

 - Nú vann Tórur Fløtt silvur í norðurlandameistarakappingini í OL-skeet, so hann er ein stórur favorittur til at vinna FM, sigur Esmar Joensen, sum eisini nevnir Marius Joensen, sum kanska verður við.