ICES ávaringin strandaði hjá aðalstjóranum

Fyrrapartin fríggjadagin tann 19. september klokkan 9.01 kom hesin telduposturin frá ICES inn í postkassan hjá trimum starvsfólkum í Fiskimálaráðnum. Talan var um eina ávaring um, at ICES fór at mæla til stóran niðurskurð í heildarkvotuni fyri makrel í 2026. Nakað, sum hevur stóra ávirkan á inntøkurnar hjá føroyska samfelagnum.

Góðar 50 minuttir seinni, klokkan 9.53, sendir Ulla Svarrer Wang, sum er ráðgevi á Fiskivinnustovuni í Fiskimálaráðnum, teldupostin víðari til Elina Mortensen, aðalstjóra. Hon skrivar TK, sum helst merkir "til kunnleika". Annað sigur hon ikki um hendan teldupostin.

Í telefonnotati frá rættleiðingarsamrøðuni millum løgmann og Jóhan Christiansen fríggjadagin, skrivar løgmaður: Landsstýrismaðurin upplýsti, at Fiskimálaráðið ikki hevði kunnað hann um skrivið frá ICES dagfest 19. september 2025.

Skjalayvirlitið hjá Fiskimálaráðnum váttar, at telduposturin strandaði í postkassanum hjá Elini Mortensen, aðalstjóra, sum ikki sendi hann víðari. Hon vil ikki viðmerkja málið í dag, og vil tí ikki siga, um hon hevur kunnað landsstýrismannin á annan hátt.

Aksel V. Johannesen, løgmaður, stendur tó fast við rættleiðingina, ið hann gav Jóhan Christiansen, landsstýrismanni, fríggjadagin.

- Tað er ábyrgdin hjá landsstýrismanninum at bera so í bandi, at hann fær allar neyðugar upplýsingar, sum eru viðkomandi, sigur løgmaður við Kringvarpið í dag.