Bjarta upp á 50: Hetta er sjúkt

Í trygga sigrinum á Paraguai spældi Bjarta Osberg Johansen sín 50. landsdyst fyri Føroyar, og nógv er broytt síðan sterka strikan spældi sínar fyrstu dystir fyri eini 14 árum síðani.

 - Eg havi ikki ordiliga nøkur orð beint nú. Vit hava akkurát spælt okkum í millumrunduna við stigum. Tað er sjúkt, flenti Bjarta O. Johansen, sum bert hevur Pernille BRandenborg omanfyri sær á dystarlistanum. Liðskiparin hevur nú spælt 54 ferðir fyri Føroyar.

 - Málið var sjálvandi allatíð at koma til millumrunduna, men vit fáa tvey stig við okkum nú, tí vit hava vunnið á topp-12 í heiminum fyrradagin, so hetta er fantastiskt, segði Bjarta Osberg Johansen eftir 26-25 sigurin á suðuramerikanska liðnum, sum nú skal spæla í sonevnda President's Cup fyri tey, sum ikki rukku víðari úr bólkaspælinum.

Hon helt, at spælið fyri steðgin var kanska eitt sindur merkt av nervum og ov nógvum brendum kjansum, men at verulig gongd kom á í seinna hálvleiki. Nú kunnu spælararnir gleða seg til miðumfarið í Dortmund, har Ísland, Týskland og Serbia bíða.

 - Ja, mín fyrsti EM-undankappingardystur var ímóti Serbia, so tað verður stuttligt at spæla ímóti teimum aftur nú, segði Bjarta Osberg Johansen. Tann dysturin endaði við 36-20 ósigri, men munnu føroysku kvinnurnar ikki hava nærkast serbum munandi síðan tá? Livst so spyrst.