Jens: Vit skulu ikki vera tær fittu genturnar í flokkinum móti Serbia

- Longu í gjár arbeiddu vit við kvinnunum mentalt, at tað er í ordan at vera kedd og ørg um dystin móti Týsklandi, men í dag arbeiða vit við teimum ymisku framferðarhættinum, sum vit kunnu møta móti Serbia.

Tað sigur Jens á Skipagøtu, mentalvenjari hjá føroyska kvinnulandsliðnum, hvussu arbeitt hevur verið við at koma víðari frá dystinum móti Týsklandi í gjárkvøldið, men eisini hvussu liðið miðvíst fyrireikar seg mentalt móti dystinum móti Serbia í morgin, sum kann fara at vísa seg at verða ein harður dystur - bæði fysiskt og mentalt.

Tær serbisku kvinnurnar eru kendar fyri tað fysiska og harða spældið, og í dystinum móti Spania í gjár fingu serbisku kvinnurnar fitt av tveimum minuttum, men eisini eitt reytt kort fyri hart spæl.

- Vit skulu vera mentalt klárar at taka móti teimum, og vit skulu ikki lata okkum lynda, um spælið verður hart og skitið til tíðir. Men vit skulu ikki vera tær fittu genturnar í flokkinum móti Serbia. Vit skulu eisini tora at verða nøkur bartrog móti teimum, sigur Jens á Skipagøtu.