Heimaframleiddu matvørurnar skeivt merktar

Tað vísir ein kanning, sum Heilsufrøðiliga starvsstovan gjørdi í nøkrum matvøruhandlum.

Endamálið var at kanna, um keyparin fær nóg góða upplýsing um heimaframleiðslu. Tað fær hann verri enn so altíð, er niðurstøðan.

Kannað varð, um heimaframleidda vøran var merkt á rættan hátt. Eisini varð hugt eftir, um veitarin var skrásettur sum heimaframleiðari, og um vøran varð hildin atskild frá aðrari vøru. 

Átakið økt um kunnleikan

Samanumtikið vísti kanningin hjá Heilsufrøðiligu starvsstovuni, at minni enn helvtin av heimaframleiddu vøruni var merkt á rættan hátt. 

Flestu vørurnar høvdu navnið á framleiðaranum, men bara 38 prosent merktu vøruna við orðunum Óløggild og unauthorized.

Heilsufrøðiliga starvsstovan metir, at hetta átakið hevur økt um kunnleikan og ansnið hjá matvøruhandlum at tryggja sær, at tað er í lagi at selja heimaframleidda vøru.