Dia Midjord verður venjarin í Noregi

Dia Midjord verður fulltíðarsettur í norska felagnum Florø SK Handball, og verður høvuðsvenjari hjá besta mansliðnum og kvinnuliðnum hjá felagnum. Eisini fær hann fakligu ábyrgdina av venjingini í ungdómsdeildini, veit Portal.fo at siga frá.

Setanini av Dia Midjord er ein liður í eini ætlan  at lyfta støðið í felagnum, so at felagið kann staðfesta sína støðu sum ein kraftdepul í norskum hondbólti “millum Bergen og Molde”.

Dia Midjord byrjar í starvinum í august.

Umleið 9.000 fólk búgva í Florø, ið liggur við vesturstrond Noregs, umleið 150 kilometrar norðan fyri Bergen. 

Dia Midjord er útbúgvin journalistur, útbúgvin í Noregi. Hann var stjóri fyri Kringvarp Føroya árini 2012 til 2017. Seinastu árini hevur hann verið stjóri í Pf. Auto, men fór úr hesum starvi herfyri.