Óli Mittún skaraði framúr í tapi fyri Eysturríki

Óli Mittún skaraði framúr, tá Føroyar taptu við tveimum fyri Eysturríki í EM-undankappingardysti í Havn.

17 ára gamla stórtalentið, sum spældi sín fyrsta A-landsdyst á heimavølli, skeyt sjey mál og átti næstseinastu hond á fleiri, men helldur ikki hesa ferð rakk tað til stig hjá føroysku hondbóltsmonnunum.

Góð byrjan

Eins og í dystinum ímóti Ukraina byrjaðu Føroyar og Tróndur Mikkelsen væl. Heimaliðið var frammanfyri við trimum tíðliga, men Eysturríki fekk nøkur skjót mál og kom innaftur í dystin.

Óli Mittún kom munandi fyrr á vøllin enn í Týsklandi, og unglingin úr IK Sävehof brúkti heldur ikki langa tíð til at gera vart við seg. 

Við sínum skjóta fótskifti breyt hann ígjøgnum ferð eftir ferð, og um úrslitið ikki varð mál, varð tað ofta útvísing í staðin.

Runnu aftaná

Tað var javnleikur í steðginum, og í seinna hálvleiki leikaði eisini javnt á.

Heldur nógv lá á herðunum á yngsta manninum, sum kortini væl og virðiliga lyfti uppgávuna, men Eysturríki fekk nakað nógv løtt mál onkra løtu.

Tí mátti føroyska liðið renna aftaná meginpartin av seinna hálvleiki, og viðhvørt eydnaðist at koma upp á javnt.

Men Eysturríki fór framum 23-22, og Føroyar megnaðu ikki aftur at fáa fast eftir hetta, og so endaði tað við teprum 30-28 tapi.

Einki stig enn

Føroyar eru sostatt byrjaðar undankappingina til EM við tveimum tapum - fyri Ukraina og Eysturríki - og tí stendur eisini null á botnlinjuni.

Avrikini, serliga tað ímóti Eysturríki, hava kortini verið góð, og nú er steðgur til í mars. Tá er Elias á Skipagøtu vónandi til reiðar aftur og kann taka sítt pláss í bakketuni undir liðini á Óla Mittún og hinum, sum eisini spældu ein góðan dyst.

-----------

Høllin á Hálsi (EM-undankapping)
Føroyar - Eysturríki, 28-30 (14-14)

Toppskjúttar, Føroyar: Óli Mittún 7, Hákun West av Teigum 5, Theis H. Rasmussen