Bæði heiðursmerki og met á Pallas Spelen í Malmø

Trý føroysk met í frælsum ítrótti vóru sett, tá føroyska landsliðið í frælsum ítrótti kappaðist til innandurakappingina, Pallas Spelen, í Malmø um vikuskiftið.

Harafturat vunnu føroysku íðkararnir fleiri heiðurmerki.

Jónas aftur metmaður

Jónas Isaksen úr Bragdinum bøtti aftur hesa ferð um metini á 200 og 400 metra renning, sum hann átti sjálvur. Hann rann 400 metra teinin upp á 49,04 sekund, og hetta var nóg mikið til silvurheiðursmerki. Á 200 metrum vann hann gull við tíðini 22,02 sekund.

Føroysk ítróttasøga

Tinna Berg Jørgensen, ið dagliga venur í Hvirluni, setti nýtt føroyskt met á 60 metra teininum og skrivaði ssamstundis føroyska ítróttasøgu. Við tíðini 7,99 sekund er hon fyrsta føroyska kvinnan undir 8 sekund á 60 metrum.

Fleiri heiðurmerki

Eiri Jógvansson Glerfoss úr Bragdinum vann gullheiðursmerki í longdarlopi, tá hann leyp út á 7,03 metrar.  Jónas Isaksen fekk silvurið fyri sítt lop, ið var 6,73 metrar. 

Harafturat vann Eiri Jógvansson Glerfoss bronsu í 60 metra renning, sum hann rann uppá 7,11 sekund. Hennie Maria Reginsdóttir Samuelsen, Bragdið, fekk bronsumerki fyri at loypa 9,40 metrar í trístøkk.

Tilsamans vóru 16 føroyskir íðkarar við í kappingini í Malmø.