Jarðskjálvti: Níggju fólk deyð og 800 løstað

Jarðskjálvtin í Taivan í nátt hevur kravt í minsta lagi níggju mannalív, og 800 fólk eru løstað, upplýsa taivansku myndugleikarnir sambært Reuters.

Jarðskjálvtin rakti Taivan, Okinawa-oyggjarnar í Japan og Filipsoyggjarnar. 

Ávarað var eisini um flóðaldu, og fólkið í Okinawa-oyggjunum var biðið um flyta burtur.

Nú eru ávaringarnar avlýstar.

Sambært amerikanska jarðfrøðisstovninum, USGS, var jarðskjálvtin mátaður til 7,4.

Hetta er harðasti jarðskjálvti, sum er mátaður í Taivan í 25 ár. 10.000 húski hava mist streymin.

Tíðindamaðurin hjá danska kringvarpinum í Asia, Philip Róin, sigur, at fólk í økinum eru von við jarðskjálvta, og at infrakervið er bygt at tola harðar skjálvtar. 

Ritzau skrivar, at higartil eru 50 eftirskjálvtar skrásettir.