Nato skal samskipa hernaðarliga stuðulin til Ukraina

Nato skal frameftir samskipa hernaðarliga stuðulin til Ukraina.

Jens Stoltenberg, aðalskrivari í Nato, kunngjørdi hetta á fundi við verjumálaráðharrarnar í dag.

Talan er um leiðsluna í sonevnda Ramstein-bólkinum, sum samskipar hernaðarliga stuðulin úr Vesturheiminum til Ukraina.

- Eg vænti, at ráðharrarnir fara at góðkenna ætlanina um, at Nato tekur yvir uppgávuna frá USA at samskipa vápnastuðulin, sigur Stoltenberg.

Higartil hevur USA skipað arbeiðið í Ukraina Defence Contact Group - stytt UDCG -  sum eisini verður nevndur Ramstein-bólkurin.

At Nato tekur við leiðsluni, verður tikið sum tekin um, at Nato tryggjar seg móti møguligum valsigri hjá Donaldi Trump á forsetavalinum í USA í heyst, skrivar NTB.