Nigel Farage valdur í parlamentið

Formaðurin fyri Reform UK og brexit-oddamaður, Nigel Farage, er fyri fyrstu ferð valdur í bretska parlamentið. 

60 ára gamli Farage stillaði upp fyri flokkin Reform UK, ytst á høgra vongi í bretskum politikki, í Clacton-on-Sea í landsynningspartinum av Onglandi. Hann hevur sjálvur stovnað flokkin.

Á tíðindafundi í gjárkvøldið takkaði hann sínum veljarum og rósti flokkinum fyri at hava klárað seg so væl.

Hann fanst eisini hvassliga at formanninum í Labour, Keir Starmer, tí Starmer ongan eldhuga hevur og sigur, at Reform UK nú fer at dyrgja eftir Labour-atkvøðum:

- Formaðurin í Labour Keir Starmer hevur ongan eldhuga. Satt at siga er helvtin av atkvøðunum anti-konservativar atkvøður. Henda stjórnin fær trupulleikar sera, sera skjótt. Vit fara at royna eftir Labour-atkvøðum, eingin ivi um tað, segði Nigel Farage í gjárkvøldið.

Á valinum í 2019 fekk flokkurin, sum hann stillaði upp fyri seinast, Brexit Party, 644.000 atkvøður, men ongan sess.

Í eini kanning sum var gjørd fyri BBC, Sky og ITV á valdegnum í gjár, fær Reform UK 13 sessir í parlamentinum.