Føroyskur dámur yvir mentanarnáttini í Reykjavík

Tónleikur, list, heimildarmynd, rithøvundaprát og føroyskur matur eru á skránni, tá skipað verður fyri Menningarnóttini í Reykjavík í morgin, leygardagin, 24. august

RSP fara á pallin sum partur av føroyska partinum av skránni til mentanarnáttina í Reykjavík í morgin, leygardagin

Mynd: Bjarni Árting Rubeksen

Uni L. Hansen

23.08.2024 - 15:37

Nú stundar aftur móti árligu Menningarnóttini í Reykjavík, har býurin er um at kóka yvir av mentan, veitslulagi og fólki í góðum lag.

Aftur í ár er føroysk list og listafólk partur av skránni fyri mentanarnáttina í íslendska høvuðsstaðnum, og í ár verður føroyska luttøkan størr enn vanligt.

Sum vant skipar Sendistova Føroya, saman við Tórshavnar kommunu sum er vinarbýur Reykjavíkar, fyri tveimum tiltøkum á mentanarnáttini – eitt á sjálvari sendistovuni og hitt í Hørpuni.

Sí eisini: Skráin fyri føroyska partin av Menningarnóttini í Reykjavík

Borðreiða við føroyskum mati

Tiltakið á Sendistovu Føroya byrjar kl. 13, har verður borðreitt við føroyskum mati, Elinborg spælir nøkur løg og Gallarí Havnará sýnir list við Sigrun Gunnarsdóttir, Astri Luihn og Bárði Dal Christiansen.

Síðani verður verður føroysk konsert salinum Kaldalón í Hørpuni Knút, Elinborg og RSP. Kaldalón er minsti salurin í Hørpuni og er staðsettur á fyrstu hædd.

Tiltakið í Hørpuni byrjar kl. 15.10. Eftir konsertirnar verður heimildarfilmurin "Heartist", ið snýr seg um listakvinnuna Sigrun Gunnarsdóttir, sýndur.

Heartist

Úr heilmiildarfilminum "Heartist" (Mynd: Rógvi Rasmussen)

Hóast sjálv Menningarnóttin er leygardagin 24. august, so verður føroysk mentan eisini á skrá dagin eftir.

Sunnudagin kl. 16 skipar Norræna Húsið í samstarvið við Sendistovu Føroya fyri rithøvundakvøldi, har íslendski rithøvundurin Einar Már Guðmunsson hevur samrøðu við føroyska rithøvundin Carl Johan Jensen um lív og verk hansara. Samrøðan verður á íslendskum.