Stjórin í FBI leggur frá sær

Stjórin í amerikansku samveldisløgregluni FBI, Christopher Wray, leggur frá sær stutt eftir ársskiftið.

Hesum boðaði FBI frá í gjár.

Avgerðina um at leggja frá sær hevur Christopher Wray tikið, eftir at komandi amerikanski forsetin Donald Trump hevur givið ábendingar um, at hann ætlar at koyra Wray úr starvinum, og í staðin seta advokatin, Kash Patel, í stjórasessin.

Donald Trump setti sjálvur Christopher Wray sum stjóra í FBI í 2017 til at sita í 10 ár, sum er vanliga áramálið hjá FBI-stjórum. 

Men viðurskiftini millum Trump og Wray - og FBI sum heild - versnaðu í 2022, tá FBI gjørdi húsarannsókn heima hjá Trump í Florida fyri at finna skjøl, sum Trump hevði tikið við sær úr Hvítu Húsunum.