HM-dystir í fótbólti í USA møguliga fluttir

Ítøkiliga hóttir Donald Trump við at flyta HM-dystirnar í fótbólti í 2026, sum eftir ætlan skuldu verða í Boston. Tað skrivar íslendski miðilin Vísir.is. Sjey dystir í HM næsta ár skulu eftir ætlan spælast á Gillette leikvøllinum í Massachusetts, heimstaður hjá New England Patriots í NFL-deildini. Michelle Wu, sum hevur verið borgarstjóri í Boston síðani 2021, er demokratur.

Trump sigur, at hon er klók, men radikal vinstravend.

- Vit kundu tikið dystirnar frá tykkum. Eg elski fólkið í Boston og eg veit, at tað verður útselt til leikirnar, men borgarstjórin hjá tykkum er ikki góður, sigur amerikanski forsetin, sum áður hevur hótt við at flyta HM-dystir úr býum, har demokratar hava valdið.

Infantino upp í leikin
Eftir hóttanirnar hjá Trump, gjørdi altjóða fótbóltssamgongan FIFA bart og segði, at heimildin at flyta dystir á HM-stigi liggur bara í hondum hjá FIFA. Men Trump gavst ikki og segði, at hann fór at umrøða hetta við góða vin sín, FIFA-forsetan Gianni Infantino, og at hann fer at flyta dystirnar úr ótryggum býum.

- Um onkur ger eitt vánaligt arbeiði, og eg haldi, at trygdin er í vanda, so hevði eg ringt til Gianni, stóra forsetan í FIFA, og sagt við hann: ‘Latið okkum flyta dystirnar,’, og so høvdu teir gjørt tað, segði Trump, og legði afturat, at Infantino kanska ikki er fegin um at skula skifta vøllir, men hann hevði gjørt tað.

Fyrr í hesum mánaðinum vórðu fýra løgreglufólk særd í sambandi við mótmæli hjá palestinskum stuðlum í Boston Common.

HM næsta summar verður í Kanada, USA og Meksiko. Leikirnir verða spældir í 11 býum í USA.