Við ommu og abba í Trier

Sólvá Eystberg og Geir Wardum, sum bæði eru kend í hondbóltshøpi, teljast millum tey, sum fylgja føroysku hondbóltskvinnunum í HM-endaspælinum, sum byrjar í morgin.

Saman við ommu- og abbasoninum og versoninum Brandi Halgirsson vera tey millum áskoðararnar í Trier, tá Føroyar fara á vøllin ímóti Montenegro í annaðkvøld.

 - Vit fara at fylgja hondbóltslandsliðnum, og vit hava eina dóttur, sum spælir við, sigur Geir Wardum, sum saman við familjuni er farin til Trier at fylgja Mariannu Geirsdóttir Eystberg og hinum føroyingunum í HM-endaspælinum.

 - Tað er øgiliga spennandi, viðhvørt eitt sindur nervapirrandi, men mann er bara spentur, øgiliga spentur, sigur Sólvá Eystberg, sum sjálv spældi hondbólt í nógv ár.

 - Tú er meir nervøs, tá dóttirin spælir, staðfestir hon, men leggur afturat, at ferðin ikki steðgar í Trier.

 - Vit hava bílagt okkum hotel í Dortmund, so eg trúgvi, at tær spæla seg víðari, sigur Sólvá Eystberg.