Liðskiparin: Shit, vit eru kular

 - Shit, vit vóru kular, staðfesti føroyski liðskiparin Pernille Brandenborg eftir frálíka sigurin hjá Føroyum á Íslandi við Tjarnir.

Og ein kundi ikki annað enn at taka undir við strikuspælaranum, sum sjálv spældi einastandandi við 12 málum upp á 12 skotroyndir í 35-30 sigrinum.

 - Tað var deiligt. Tað var ótrúliga deiligt ein dag sum hendan. Eg vil helst ikki sita einsamøll eftir í Rumenia í desember, so eg eri fegin um, at vit vunnu í dag, segði Pernille Brandenborg, sum í summar skiftir til CSM Bucuresti.

Alt bendir á, at hon ikki nýtast at stúra fyri tí. Við sigrinum spældi Føroyar seg á sjálva EM-gáttina, og um Portugal tapir í Montenegro í annaðkvøld, eru plássið í endaspælinum tryggjað.