Starvsheitini hjá løgtings- og landsstýrisfólkum komin aftur í tingið

Løgtingið fer aftur í morgin at viðgera eitt uppskot frá formansskapinum um at broyta starvsheitini løgtings- og landsstýrisfólkum. 

Sambært uppskotinum kann starvsheiti á løgtingsfólki eisini vera løgtingsmaður ella løgtingskvinna.

Starvsheitið hjá landsstýrisfólkum kann eisini vera landsstýrismaður ella landsstýriskvinna, og starvsheitið hjá løgmanni og varaløgmanni kann vera løgkvinna ella varaløgkvinna. 

Av tí at broytingarnar verða gjørdar í stýrisskipanarlógini, er neyðugt, at tvey løgting samtykkja tær. 

Undanfarna løgting samtykti broytingarnar í mai 2023, og nú skal nývalda tingið eisini taka støðu til tær. 

Skotið verður upp at beina málið í eina serliga grein 25-nevnd, og verður tað gjørt, verður nevndin eisini vald á tingfundinum í morgin.