Fýra milliónir við í sjúkratrygging hjá Obama

Umleið fýra milliónir amerikanarar hava higartil skrivað seg upp til nýggju sjúkratryggingina, sum Barack Obama hevur arbeitt fyri at fáa innført í USA.

Higartil hava umleið 700.000 amerikanarar í februar mánað skrivað seg upp til sjúkratryggingina, sum á mannamunni eisini verður nevnd Obamacare.

Tá latið varð upp fyri sjúkratryggingini í oktober 2013, vóru so nógvir tøkniligir trupulleikar við skipanini, at freistin hjá amerikanarunum, at skriva seg upp, varð longd til 31. mars 2014.

Sjeyndi hvør amerikanari onga sjúkratrygging

Í USA búgva umleið 310 milliónir fólk. Mett verður, at 45 milliónir amerikanarar onga sjúkratrygging hava, og tískil sjálvi mugu gjalda, skulu tey hava viðgerð á einum sjúkrahúsi.

Higartil hava amerikanarar teknað sjúkratrygging privat. Teir flestu amerikanarar, ið hava sjúkratryggingar, hava fingið sjúkratrygging goldna frá arbeiðsgevarum sínum.

Mett verður, at seks milliónir fólk í USA fara at skriva seg upp til nýggju sjúkratryggingina, áðrenn freistin endar 31. mars, tað vil siga um tveir mánar, skrivar dr.dk.