Skattaavtala við Hong Kong um gjøgnumskygni

Føroyar eru við, nú Norðurlondini hava gjørt sáttmála við Hong Kong um upplýsingaskyldu í skattamálum.

Sáttmálin varð undirskrivaður á íslendsku sendistovuni í París fríggjadagin. 

Sambært sáttmálanum skulu londini lata hvørjum øðrum upplýsingar um skattaviðurskifti hjá fyritøkum og einstaklingum. 

Sambært íslendska fíggjarmálráðnum eru Ísland, Danmark, Føroyar, Grønland, Noreg og Svøríki við í sáttmálanum, sum er gjørdur við Hong Kong.

Avtala við 44 lond

Síðani 2007 hevur ein bólkur hjá Norðurlendska ráðharraráðnum arbeitt við at fáa í lag sáttmálar við lond, sum hava lágan skatt og ikki áleggja bankum at upplýsa nakað sum helst um sínar kundar.

Fólk, sum vilja sleppa undan skattavaldinum í heimlandinum, brúka bankar í slíkum londum til at krógva sínar pengar.

Nú hava Norðurlondini gjørt avtalur við 44 lond um upplýsingaskyldu.

Sáttmálin, sum nú er gjørdur við Hong Kong, loyvir til dømis TAKS at biðja skattamyndugleikarnar í Hong Kong um upplýsingar um føroyskar fyritøkur og føroyingar. 

Allir slíkir sáttmálar sum tann millum Norðurlondini og Hong Kong skulu góðkennast og staðfestast í londunum, áðrenn teir koma í gildi.