Nógv ávirkað fólk úti í nátt

Tað var nógv fólk úti í nátt, men tað var sum heild bæði gott skil og gott lag á á fólki, sigur vaktleiðarin á politistøðini í Havn, Hallgrím Hansen.

Ein var tikin fyri rúsdrekkakoyring, og tveir mans høvdu so høga promillu, at løgreglan metti, tað var best, at teir svóvu rúsin av sær, áðrenn teir sleppa heimaftur.

Innbrot var í nátt í sølubúðina hjá Okkara á Karlamagnusarbreyt í Hoyvík. Løgreglan veit ikki enn, hvussu nógv tystu tjóvarnir hava tikið við sær haðani.

Kannaðu skeinkistøðini

Fólk frá løgregluni vóru í nátt runt á skeinkistøðunum í høvuðsstaðnum, har kannað varð, um viðurskiftini hjá skeinkistøðunum vóru í lagi.

- Vit kannaðu, um tey halda seg til lógina, at rýmingarleiðir ikki eru blokeraðar og at einki fólk undir 18 ár er á skeinkistøðunum, sigur Hallgrím Hansen.

Har var einki at finnast at. Viðurskiftini á skeinkistøðunum, løgreglan kannaði í nátt, vóru í lagi, sigur vaktleiðarin á politistøðini í Havn.