- Tíðindi, mentan og ítróttur
Screening fyri bróstkrabba kostar 1,5 mió. kr.
Tað fer at kosta umleið 1,5 millión krónur aftrat um árið at seta eina screeningsskipan fyri bróstkrabba í verk.
Samlaðu rakstrarútreiðslurnar fyri kanningar og viðgerðir fyri bróstkrabba verða sostatt 3,8 milliónir krónur árliga tvey tey fyrstu árini.
Tað metir stýrisbólkurin fyri krabbameinsøkið, sum er komin vil einum tilmæli til landsstýrismannin í heilsumálum, í sambandi við at føroyskar kvinnur skulu kannast regluliga fyri bróstkrabba.
Bólkurin metir, at tað verður dýrari tvey tey fyrstu árini, tí fleiri tilburðir helst verða staðfestir í fyrstuni.
Tað er ein sannroynd, at tess fleiri kvinnur verða kannaðar, tess fleiri tilburðir verða staðfestir í fyrstu atløgu.
Talið minkar
Hetta talið minkar tó helst aftur til eitt útgangsstøði, sum er á leið tað sama sum frammanundan. Tó fara hesar kvinnur í framtíðini at koma fyrr í viðgerð.
Útreiðslurnar til ein bróstkrabbatilburð fevna um eitt nú skurðviðgerðir og stráluviðgerðir, og ætlanin byggir á eina skipan, har allar føroyskar kvinnur millum 50 og 69 ár verða kannaðar.
Sambært ECAC (European Code Against Cancer) eru haldgóð prógv fyri, at mammografiscreening gevur góð úrslit, og færri kvinnur doyggja av bróstkrabba.
Sjey kanningar, sum fevndu um meira eina hálva millión kvinnur, hava víst, at 25 prosent færri kvinnur doyggja, verða tær screenaðar.