Ódnin rakt Kina

Sambært altjóða tíðindastovunum hevur tropiska ódnarveðrið, sum gjørdi um seg á Taiwan í gjár rakt landsynningspartin av Kina.

Vindurin varð minkaður nakað, men var framvegis okkurt um 40 metrar um sekundið, tá ódnarveðrið rakti Kina og elvdi til stóran skaða og vatnflóð, boða tíðindastovurnar frá.

Í Fujian-landspartinum, sum liggur millum Hong Kong og Shanghai, vóru fleiri enn 370.000 fólk flutt burtur, áðrenn tropiska ódnarveðrið rakti. Eisini er øll flogferðsla har á leiðini avlýst.

Sambært tíðindastovunum fór streymurin í einum øki, har okkurt um tvær milliónir fólk búgva. 

Átta fólk hava latið lív í ódnarveðrinum, síðani ódnarveðrið rakti landsynningspartin av Kina. Á Taiwan lótu seks fólk lív í ódnarveðrinum.