Ráðharri: Flogfarið varð rakt av yvirgangsatsókn

Tað er meira sannlíkt, at flogfarið hjá EgyptAir varð rakt av eini yvirgangsatsókn enn tekniskum breki, sigur ráðharri í Egyptalandi

Eitt flogfar hjá EgyptAir, sum hvarv av radaranum í nátt, er mest sannlíkt rakt av eini yvirgangsatsókn, heldur egyptiskur ráðharri. Avmyndað er eitt flogfar hjá felagnum í mars

Jón Brian Hvidtfeldt

Bjarni Mohr

19.05.2016 - 15:40

- Sum støðan er nú, er meira sannlíkt, at flogfarið hjá EgyptAir er rakt av eini yvirgangsatsókn, heldur enn einum tekniskum breki. Tað sigur egyptiski ráðharrin í loftferðslumálum, Sherif Fathy.

Á tíðindafundi fyri løtu síðani hevði ráðharrin tó fá fakta at leggja á borðið. Enn er ikki staðfest, hví egpytiska ferðafólkaflogfarið datt niður, á veg úr París til Kairo í nátt.

SÍ EISINI Óvist hví egyptiskt flogfar er horvið

Flogfarið hvarv av radaranum klokkan trý korter til eitt í nátt, føroyska tíð, ein hálvan tíma áðrenn lending. Ein skipari á einum farmaskipi helt seg síggja eitt eldskýggj á himmalhválvinum

Skiparin sigur seg hava sæð eldskýggj okkurt um 130 sjómíl suður úr oynni Karpathos, sum liggur sunnalaga í griska havinum. Stórt leitingararbeiði fer í løtuni fram har á leiðini.

Fleiri altjóða miðlar skriva nú, at fyrstu lutirnir, sum helst stava frá hesum flogfari, eru funnir í havinum sunnanfyri Karpathos. 66 fólk vórðu umborð á EgyptAir MS804 flogfarinum av slagnum Airbus A320.