Oljuprísurin uppum 50 dollarar

Oljuprísurin er nú farin uppum 50 dollarar fyri tunnuna, og tað er fyrstu ferð síðani í november í fjør. Tað skrivar Wall Street Journal.

Seinastu mánaðirnar er prísurin av olju hækkaður støðugt, síðani hann lækkaði úr 122 dollarum, niður í umleið 30 dollarar fyri tunnuna.

Nú prísurin fór uppum 50 dollarar fyri tunnuna, er prísurin hækkaður við umleið 80 prosentum síðani í januar.

Skógareldur togar prísin upp

Greinarar vísa á, at orsøkin, til at oljuprísurin nú hækkar aftur, fyrst og fremst kemur av, at skógareldurin í Kanada hevur verið til ampa fyri oljuvinnuna har.

Støðan í Nigeria er ótrygg, tá talan er um sølu av olju. Samstundis vísti ein amerikansk uppgerð, at amerikansku oljugoymslurnar eru minni enn roknað varð við.

Í næstu viku fara tey 13 londini, sum eru limir í oljufelagskapinum, OPEC, at hava fund, og tað kann aftur ávirka oljuprísin, vísa eygleiðarar á.