Brasilia sendir herfólk til markið til Venesuela

BBC skrivar, at brasilski forsetin, Michel Temer helt kreppufund í gjár um stóra spenningin, sum er, nú alsamt fleiri fólk úr Venesuela rýma haðani undan álvarsligu kreppuni, sum er í landinum.

Venesuela hevur biðið grannalondini um at tryggja borgarar sínar frá váða. 

Grannalondini hava sett tiltøk í verk fyri at avmarka talið av fólki, sum flýggja um landamørkini, men til dømis í Ekvador ganga tíðindi um, at fólk fara um markið kortini.

Flestu fólkini, sum rýma úr Venesuela, hava kós móti Peru og Kili, har tey hava skyldfólk. Tey rýma undan politisku og búskaparligu kreppuni við risastórari inflatón og matvøru- og medisintroti.

BBC skrivar, at fleiri tilflytaralegur í Pacaraima í Brasilia vórðu álopnar av óðum borgarum um vikuskifti. Ófriðurin stakk seg upp eftir tíðindi um, at ein matstovueigari varð illa bukaður av tilflytarum úr Venesuela.