Bachelet aftur forseti í Kili

Sosialisturin, Michelle Bachelet, hevur eftir øllum at døma vunnið forsetavalið í Kili. Hon hevði fingið 63 prosent av atkvøðunum, tá ein triðingur av atkvøðunum var taldur.

Mótstøðuvalevnið, konservativa Evelyn Matthei, fekk 37 prosent av atkvøðunum.

62 ára gamla Bechelet var fyrsti kvinnuligi forsetin í Kili, og sat sum forseti frá 2006 til 2010. Hon fekk 47 prosent av atkvøðunum í fyrra valumfarinum, men tað var ikki nóg mikið til at sleppa undan einum valumfari afturat.

Evelyn Matthei var ráðharri í stjórnini hjá konservativa forsetanum, ríkmanninum, Sebastian Pinera.

Vinkonur

Forsetavalið er serligt, tí Michelle Bachelet og Evelyn Matthei vóru vinkonur barnaárini, og endaðu á hvør sínum vongi í kilenskum politikki.

Matthei er dóttir fyrrverandi herovastan, Fernando Matthei, sum var vinmaður herovastan, Alberto Bachelet, pápa Michelle Bachelet. Vinarlagið helt fram, til herovastin, Augusto Pinochet, tók valdið í Kili í 1973.

Kvettið gjørdi, at vinarlagið ímillum herovastarnar reyk. Fernando Matthei gjørdist ein týðandi herleiðari undir Pinochet, meðan Alberto Bachelet stuðlaði frákoyrda Salvador Allende. Hann varð tikin, píndur, og doyði seks mánaðir eftir kvettið.